Нохой хүнд нөхөрлөх болсоны учир

Уг нь нохой хань нөхөргүй гав ганцаар амьдардаг байв. Тэгээд ижил хань эрж явсаар чонотой тааралдаж гэнэ.
- Чоно гуай хоёул хамт амьдарвал ямар вэ? гэсэнд чоно,
- Болно, болно гээд нэг дор байх болов. Нохой нэгэн шөнө алсын анир чимээ аваад шөнөжин хуцаад чоныг унтуулахгүй байв.Чоно, ...
— Нохой чи битгий хуцаад бай! Чиний дуугаар баавгай хүрээд ирж мэднэ гэв. Нохой өглөө эртлэн босоод чоныг унтаагаар нь орхиод баавгайтай нөхөрлөхөөр яваад өгчээ. Чоно түүнээс айж байхыг бодвол их хүчтэй амьтан байгаа байх гэж бодоод, ой модон дотор баавгайг эрж явсаар арай чуу гэж олж уулзав. Нохой,
- Баавгай тантай би нөхөрлөхөөр ирэв гэсэнд баавгай хамт байхыг зөвшөөрөв. Мөн нэг шөнө нохой анир чимээ авсан юмуу хуцаад амар заяа үзүүлсэнгүй гэнэ. Баавгай,
— Чи дуугаа тат! Арслан чиний дуугаар бидэн дээр хүрээд ирж мэднэ гэв. Нохой, арслан гэж баавгайнаас хүчтэй амьтан байх нь Түүнтэй л очиж нөхөрлөе гэж санаад баавгайнаас салж явав. Арсланг олж уулзаад,
— Би тантай хамт амьдрахаар ирлээ гэвэл арслан мөн зөвшөөрчээ. Нохой бас л сурсан зангаараа шөнө хуцаж арслангийн тавыг алдуулав. Арслан,
— Чи бүү чимээ гарга! Хүн хөх төмрөө барьж ирээд биднийг алчихна гэв. Нохой маргааш өглөө нь арсланг айлгадаг тэр хүн гэдэг амьтантай нөхөрлөе гэж бодоод явав. Нэгэн хүнтэй уулзаад,
— Би тантай хамт амьдрахаар ирлээ гэсэнд хүн дуртай зөвшөөрч хамт суух болов. Нэг шөнө нохой хуцаж гарсанд хүн босож ирээд,
— Туу! туу! гэв. Тэгээд нохой энэ хүнээс илүү хүчтэй амьтан байдаггүй юм байна гэж бодоод хүнтэй нөхөрлөж одоо болтол хамт амьдарч байдаг гэнэ.

Шошго: |

4 Сэтгэгдэл:

  1. Ganchimeg Sukhee Says:

    Sain uu? Ulgeriig chin bainga unshdag. Estoi goy. Oros ulgeruud zundu oruulj uguurei. Bi udahgui mamatai boloh gj bgaan. Uuriin chin blognoos ulger unshij ugdug. Zundu ih bayarlalaa

  2. Боролдой Says:

    Tsag zav, huruuniihaa chadliin hireer ulger oruulah bolno oo!! Byarlalaaa.

  3. Ganchimeg Sukhee Says:

    amjilt!

  4. Anonymous Says:

    urt urt goy goy ulger unshlaa shu bayrlala boroldoi :)